السبت، 12 مايو، 2012

للقيد (5).....سيجارة قالت لعاشقها

سيجارة قالت لعاشقها………للقيد(5)

كتبهاloly ، في 12 مايو 2012 الساعة: 19:30 م




سيجارة قالت لعاشقها
هدَلَّعك
رد عليها بيقول
وأنا هحرقِك
وهولعِك
وأخرة مطافك هسيب باقيكي
عشان أذلِّك وأهرِسِك
وتبقي نَكِرة الكل يقرف يمسكِك
قالت وهي بتتمطع
صدقني بيك أنا فرحانة
ورجلي مَدِت وبتطلع
وغيظ كلامك
أكدلي حبي اللي فـ قلبك
وإنه ماسك ومبرطع
ولا بالكلور حتى هيطلع
… رد من غيظه وبيضحك …
ها …ها …ها
بتفرسيني؟
قصدك يعني تذليني؟
طب يا ملعونة بحبِك
لكن خلاصي كمان مِنِك
زي البساطة وبإيدي
ويوم بسرعة راح ييجي
عمرك عليَّا ما هتشاوي
ولا تقدري
زي اللي ضاعوا يوم فيكي
تقولي واللاَّ دا حبيبي
وغوري يللاَّ يا مكارة
هرميكي فـ أقربها زبالة
وقهقهِت
وصوتِت
ياخواتي هاتولي أماااااااااااارة
دانتَ ياراجل من حبي
بتبقى طالع ع السِلِم
تنهج وشوية وتسَلِم
لو طايل تِندَه على جارة
وفـ مشيك البنت المايصة
شمين ويمال كده تتمايل
بس من قلة عزمك
وماهيش ياروحي شطارة
طيب بلاش
ما تشم إيدك يا نضارة
… ومنها ينفخ بمرارة …
ويقول كسبتي؟
طيب هولَّع وفـ نفسي
عشان تحسي بخسارة
… تضحك وأكتر بزيادة …
وتقول دا بردُه يكون مني
موِّت نفسك ولحالة
يصنعها بس أسير حبي
والَّا اقولك….
والنبي ما تزعل نفسك
أصله دا مش حالك وحدك
ده حال مليون كييف زيك
لو كانوا وقدروا يفوتوني
كنت انت قدرت يا عين أمك
بقولك إيه ….
ما ترَوَّق بقا كده وتظقطط
ومعايا افرح واتنطط
ليه بس راح تشغل بالك
ما تيجي اروّقلك حالك
طب بوسني بوسة وحياتك
وكل شيء راح يحلالك
…..
أفففففففففف
مابتزهقيش؟
يا غلسة يا باردة
أنا بكرهِك
إنت جِبِلَّة ما بتحسيش؟
عمالة تشاغليني
ليل ونهار كده قدامي
تتمايعي وتغويني
يخربيتك
في حياتي كتير انتي قرفتيني
……
كده كده كده !!!!
بتقولِّلي قرفتك؟
هو انا يعني كنت جبرتَك
طب افتكر كده يوم خيبتك
وانت بتهْبد وتهَمْبَك
لمَّا عليَّا بتجري بسرعة
ومني تشد وتنفخ همَّك
طيب تنسى اللوحة إياها
اللي بتقعد ترسم فيها
وبتحلالك من دخاني
تاخد منه تحط عليها
مرة تشوفه قصور وتلال
ومرة بحور ومرة جبال
ومرة صبايا بتتلوَّى
ترقص فـ نارها وتتسوَّى
ومرة قسوة ومرة حنان
ومرة تبقى طبيعة جنان
فيها تعيش أجمل أحلام
والاَّ تخونك نعنشتك
اللي ما تحلاش غير بيَّاااا؟؟؟؟
ما ترد يا حلو انت عليَّا
ربنا يخدِك شوقتيني
يللاَّ دويتُّو يانور عيني
ونعمل ليلة من إيَّاها
اللي شقاوتِك فيها تجيني
وليَّا تدَلع وتسليني
……
الحقوا حوشوا الراجل
آل يعني سبتني من إيدك
ما تبُص يا حلو انت بعينك
طب شِد كده بقا واتمخمخ
هاتي يا مُزَّة
نفسِك حلو
وكمان شفطة
آه يا سلام يا ولاد ع الجو
شفطة كمان
يا سلام يا سلام
دي معاكي الدنيا بتحلو
هاتي كمان أكتر أنفاس
مُزَّة صحيح واللاهي يا ناس
استني بس انتي يا نيلة…
آه ……آه
نَفَسي خلاص من شفطك تاه
كان هنا واللاَّ قاعد ويَّاه
آه ياني منِك
ربنا يخدِك
قادر برده انو يدُكِك
ويدُك معاكي اللي إخترعك
أصله كان سافل مجنون
أبدع لينا وللبشرية
وكسة وإنجاز ملعون
هدعي عليه ولآخر العمر
وأكيد زيي كتير ملايين
بيدعوا عليه
وبقلوب داقت منه المُر
يلَّلا زمانه بياخد جايزة
بس تقيلة كتير على راسه
بجدارة اكيد هو ينولها
ومعاه برده اخوة عباقرة
مشيوا طريق يشبه انجازه
ويلَّلا يا زفتة انتي كمان
إمشي وإخفي من قدامي
وبُكرة انا هصبح صبحي تمام
هيكون مالكيش في حياتي كلام
وقبل دماري ما يبقى بإيدك
إيدي هتقضي عليكي بموتِك
ويكون يومي نضيف منغيرِك
ييييييييييييييييييه
تاني؟
ما بتزهقش؟
ما بتتعبش؟
نفسه كلامَك آخر اليوم
هُوَّاه نفْسُه بتاع اليوم
والمِتكرر كل نهاية وآخر يوم
ولمَّا بتيجي بداية يوم
تبدأ بيَّا بغاية الشوق
وتحلا معايا وبيَّا تروق
طب إيه رأيَك…
تيجي نتبارز؟؟؟؟؟
ونشوف مين راح يبقى الفايز
يا أموت بيك والفالحة إرادتك
أو على إيدي تسرَّع موتَّك
بس ماحدش فينا يفلِّس
أو يتلكك تلاكيك فاضية
لمَّا يلاقي عمره بيخْلص
أو هيموت بالضربة القاضية
أضف الى مفضلتك
  • del.icio.us
  • Digg
  • Facebook
  • Google
  • LinkedIn
  • Live
  • MySpace
  • StumbleUpon
  • Technorati
  • TwitThis
  • YahooMyWeb

ـــــــــــــــــــــــــــــــــــــــــــــــــــــــــ

التصنيفات : غير مصنف |   دوّن الإدراج  التعليقات ممنوعة لهذا الإدراج
عفواً، التعليقات ممنوعة لهذا الإدراج

هناك 3 تعليقات:

  1. أزال المؤلف هذا التعليق.

    ردحذف
  2. لولى مدونتك ملخبطة انا ضغت لى فستان ذنوبة وعلقت واكتشفت بعد كدة ان الادراج سيجارة قالت لعشيقهافحذفت التعليق هبلة بعيد عنكهههههههههههههههه
    مشكنت عملته نسخ

    ردحذف
    الردود
    1. والله يا نهى انا دخلتها اهو لقيتها عادية مش عارفة في ايه بقى وأصلحها إزاي وانا مش شايفة لخبطة عندي

      حذف