الاثنين، 26 مارس، 2012

للقيد (4).....حكاية راجل عسولة (من ديواني طعم الحياة)

حكاية راجل عسولة(من ديواني طعم الحياة)…للقيد4

كتبهاloly ، في 26 مارس 2012 الساعة: 18:30 م



حكاية راجل عسولة

ياخواتي يا ناس على ده راجل
هيطيرلي البرج الفاضل
بسلامته ناوي يجنني
بخفة دمه وعقلي الجني
ويقول إيه جياله مجنونة
طب والله معاه مظلومة
ولو خرصة تقعد ويـَّاه
راح تنطق وتكون شعنونة
آل إيه بيقعد ع اليوتيوب
ويلف ويجلب اخبار
أو شيء بيه العقل يدوب
وإبن الإيه آل له سقطات
وكمان بيفكر إن لعقلي
يقدر يعملُّه فورمات
بس دا إيه
وحياتكم لو أنوي عليه
لأخليه….
مش عارف برَّه من بيته
ولا يمشي برجله ولا إيده
بس الواحدة معاه بتقول
خليني خلاص فـ المعقول
وأسيبه بنفسه فرحان
وكأنه الطفل الولهان
على أمه كتير كده يتدلع
يفرد نفسه وبيتمطَّع
بيني وبينكم
أصل أنا بيه قلبي مبسوط
ومظقطط ويموت فيه موت
ماهو عسولة
وخفة دمه
كتير تغفرله
وعقلي أكيد هيفلسع منه
… وآه يانا عليه خلبوص…
له نوادر لو أجمع فيها
راح أعملها كتاب مخصوص
وبألفاظه أملا قاموس
ولو يقعد وفـ وسط آلاف
ياكل القعدة بظرف وخفة
ولا يطلع من تحت إيديه واحد مبؤوس
… وإتفرج ويـَّايا فـ أدبه…
لمَّا بيحكي وألاَّ بيسرح
وتفلت كلمة من إيـَّاها
أو كلمات تتنطط منه
رايحة وجاية كده قدامي
وتزيد حبي معاه إعجابي
أصل حكايته
غير إسلوبه ابن العسوله
اللي يجنن مليون منه
إنه اداني القرب فـ ظله
وكأنه بيحكي مع نفسه
ومهما يكون الصادر منه
مش هيحاسب ولا بيجمل
زي تمام أما الانسان
يمشي فـ بيته يكون عريان
أو بيبادل فـ الافكار
جُوَّه فـ عقله أو مع روحه
ومهما تكون فـ الشكل تبان
مش هيكون منها الخجلان
وفجأة لقيتني معاه أنا ستره
وإحتليت أنا منصب روحه
وخدت مكانته
… ويالهوي على عقله كمان …
وفراسته ولا فـ الحسبان
ومشاغبات ياخواتي جنان
لمَّا بيقعد كده ويفصص
في صحابي أو حتى كتابتي
ولسانه يقطَّع ويقصقص
طب هحكيلكم مقتطفاية
من جانب له فيه ويَّايا
لو قلت عجايب وحكاية
يبقى شوية عليه ومعايا
وإخترتلكوا الانترنت
أيام مانويت فيه إني أخوض
منها هواية وأكتب نوت
ومنها دراسة لمجتمعات
عايشه معانا وخَفْيَة علينا
زي تمام رِجل ومخفية
جوه وداخل جزمة بـ بوط
ولا أخفيش أبدا وعليكم
لما دخلت انا فـ التدوين
ومدونتي إسمالَّلا عليها
ومن العشرة معاها سنين
شفت بلاوي
عرفت كتير
إيشي منافق
وغيره حقير
واللي حقودي
ولغيره يكرهله الخير
واللي بتاع نسوان مهياص
فـ الأول بيمارس العفة
بعدين يقْلب
ولا يقدرش يداري كتير
واللي مثقف من برَّاه
ويدير ندوات وكأنه خطير
يكتب أشعار ولا فـ الاساطير
تيجي تدْخُلُّه……..
ومن جواه تيجي تقراه ……
تلقى جلَنف
ولا يسواش إتنين مليم
واللي تصاحبه ويطلع صاحب
صاحب صاحبه
حقيقي وشهم وقلبه كبير
ولا له أبدا فـ التلوين
ودا منه مافيش إلا قليل
تقفش فيه
وتنوى عليه
تلحق تحفظ إنشالَّلا صوابع رجليه
فـ فريزر بالتلج العالي
لجل تصونه لباقي العمر
تتغذى وتتجمل بيه
أصله دا زي الفرخة البلدي
في عز وباء الطير إيَّاه
واللي صانتها أيادي أصيلة
ورَبِت فيها بأصل البلدي
كريمة وعرفت تنتج فيها بكل ضمير
منغير نفخ وحقن عويل
أو تدليس بيجيب أمراض
منه كتير يتهد الحيل
وأنا من عادتي
أو ممكن تتسمى هوايتي
ألِم وأعرف كله كليل
وأهو الوقت بيبقا كفيل
لازم حتما إنه يبين
أصل الأصلي من التقليد
ومعاه عمر ماحد بيقدر
يخفي حقيقته أو أسراره بتبقا فـ بير
وأكشف ويَّا الوقت كمان
انه دا عالَم صورة وطبق الأصل تمام
منه ونفسه العالـَم برَّه
بس الفرق…
قبل الشكل بتقرا كلام
يخفي ملامح أو تعبير فـ الكدب يبان
ويزوِد ع الشاشة بإيده
حبة ملح يظبَّط طبخُه
يمكن حبة يأخَّر فهمه
وفـ وقته يطول أيام
ودا برده نفسه وبيحصل
لعباقرة تمثيل دنيانا
واللي بتِقدر تصنع بسمة
رغم الغيظ فـ القلب وصاحبه
فـ الآخر بيكون خيبان
أما أروبتي إبن المجنونة
وقبل الوقت ما يثبت شيء
له توقع أنا بيه مخبولة
لكل صديق بيعدي جديد
ولو من أول صفحة شات
أو من كام كلمة فـ تعليق
أو حتى مكالمة تليفون
ولو صوته يكون فيها حديد
مافيهاش غير بعض الكلمات
ولا يمكن تظهر علامات
ويَدَخَّل بوزُه ومن نظرة
ممكن يحكي عليه حكايات
ويقول مثلا ده مغشوش
له حاسبي
زيه الناس له ما يآمنوش
وكالعادة ماسمعش كلام
وأعانده أو اقولُّه حرام
ليه تحكم منغير دلالات
دا صعيدي وبلاده بلاد
وعليها بيحكوا الشهامات
ويقُللي دا صعيدي تعبان
وهيطلع قاعد مكبوت
لمراته زي المخبوط
ومعاها ينش الدَّبان
ويعسعس بين النسوان
يمكن يلقى الست الهبلة
اللي توافق تمسك طبلة
ويـَّاها فـ عيون الناس
يبقوا دويتُّو عليل خيبان
طيب بصي فلان وفلان
أو سيبك من ده عِلاَّن
وفلان ده راجل محتال
وأقول لأَّه يا حلو يا لايت
المرادي هتطلع أَوِت
أصل فلان ده راجل دين
ماشي بينشر فـ الأقاويل
ومدونته تشُر فتاوي
ويـَّا نصيحة شمال ويمين
ويقول طيب أنا راح أسيبك
وبكرة تجيلي تقولي جديدك
وإنتي مناصرة للأوقات
وبتِتِبْعي الإختبارات
كنت هوفر وقت عليكي
بس الأحسن برده معاكي
تلمي كتير مـ الشخصيات
لجل تخوضي النفسيات
وبالنسبالك آهي دراسات
وإبن الناصحة اللي مافيش منه
لازم حتما أي توقع يفصح عنه
ييجي فـ الآخر
يبقى حقيقة ويثبت كله
قال دا كريم
قال دا عبيط
قال محتال
قال هوَّال
وكتير غيرهم مـ الأشكال
نظرة عينه فـ أول لَقطة
هي الصورة وهو الحال
… طب بالذمة …
شفتوش كده راجل عسولة
دم خفيف
عقل نضيف
وصفة متينة
ولا فيش منها ولا كبسولة
… لأ إتفرج لسة عليه …
وإضحك على حيرتي في إيديه
لمَّا اكتب موضوع وحكاية
كده يعني زي النمَّاية
وأكون كاتباه بالعامِيَّة
ويكون قاعد ناوي عليَّا
يمسك بالكلمة والجملة
وعليها يطلع إفَـَّاية
ويعلق ويقطع فيَّا
ويقللي أكيد كنتي فـ حارة
أو من رُوَّاد قهوة زبالة
بتلِم وتجمع مخابيل
بيسموا البيئة دي رسالة
وأما يكون موضوع فـ سياسة
ودي دايما تقلب بخناقة
ولازم أبقى معاه محتاسة
ويخليني أشد فـ شعري
وبنتفقوا :
ولا جنبه آجي ولا جنبي
وكتيرنا دقيقة وبتعدي
ونروحوا ونيجوا فـ البيت
ونخبَّط الإيد فـ الإيد
آل يعني البيت كده داق فجأة
مافاضلش مكان غير بالذنقة
وبنشتغلوا نظام تماحيك
هو يخَبـَّط……أمشي أخَبـَّط
أهي حكة وآهي تلاكيك
يمكن واحد يبدأ منـَّا
ويريحنا من تلاكيكنا
وإبن الإيه أبو دم خفيف
يعمل حركة من حركاته
تيجي فجأة زي حالاته
آه منه وآه يا لطيف
وأنا طبعا ياخواتي ما أصدَّق
وفـ ضهره أروح شبطانة
وكأنه بياع خروب
وسيادْتي قِدرة مليانة
أو حشرة وقفشت على ضهره
وينفض فيها بتلبدله
طب أعمل إيه بس ياناس
ماهو دمه خفيف إبن الناس
على إيده إتجننت خلاص
ولو الوقت عدَّى وفات
ودخلت ساعة بدون حكايات
ولا شفتش حركة ولا لفظ
من قلة أدبه إبن الحظ
لو يعني كرامته عليه نقحة
وقال أربيها البت البجحة
وآل يعمل زعلان ويَّايا
ويصدرلي الودن الطرشة
وامشي تمام أنا زي الهبلة
اللي بعيد عن السامعين
وجميع الستات الحلوين
ضاعت منها صيغتها الغالية
أو خاتم بالفص إيـَّاه
وقت شراه حول العين
وأصبح نن مع الجفنين
وأكيد الستات عارفين
إن الواحدة تضَيَّع عَيِل
إلاَّ الفص يعيش لسنين
ولمَّا يشُط جنوني معاه
وتخلص حِيَلي معاه لرضاه
آجي رزعاه
بوسة في قفاه
ييجي واقع ومسخسخ مني
وشوية وآل إيه ويقللي
إمشي بعيد يلَّلا يا ملعونة
يوم ماعرفتك كانت شمسه
أكيد مجنونة
أو كان عيني عليها لمونة
وألاَّ أقولك….
طب إيه رأيك
نرجع تاني كأني ما شفتك
وإنتي اختاري واد مـ الفافي
اللي بيعمل شعره كنيش
أو بينادي بكلمة بابي
حد يعاكسك يجري ينادي
يتنطط ويقول يا شويش
مُزَّة هناك حواليها عصابة
ويقول أصل انا فيها ماليش
والنبي إيه
ماكان مـ الأول يابن الإيه
إنت وقعت يا واد يا خفيف
وانا ويَّاك يا عنيَّا يا روحي
غير لو كانت طلعِت روحي
ويوم ما تموت أنا برده معاك
أصل بدونك مش هنساك
ولو بعدك في حياتي دقيقة
برده آخرها هاجي وراك
أمال يعني مين فـ رقبتك أو في قفاك
راح تلبدلك بس هناك ؟
ويصرخ مني بعلو الصوت
يانهار إسود
حتى الموت ؟؟؟؟؟؟
أما صحيح لزقة وشبطتلي
طيب بصي :
أنا أخطائي كتير يا لطيف
مليون مية
هدخل بيها جهنم حامية
وإنتي رقيقة يا حبي كتير
وهناك حر عليكي خطير
طيب ليه ؟؟؟؟؟
يبقى سيبيني أروح مع نفسي
وأفلت منك وحدي خفيف
وإنتي اتهني مع التكييف
شفتوا الراجل!!!!!
طب وحياتكم فيه كده أبدا ظُرف مخيف
أو في عقل يقدر يصمد مع ده راجل حتى خريف ؟
آل يعني العقل كان ناقص
ما كفاية ياراجل وبناقص
مش فاكرة الفصحى من العامِيَّة
ولا حتى قواعد عربية
ولا عارفالي الواو مـ المِن
ولا حتى الفي مـ العَن
ولا تقوليش كان وإن
ولا باقي إخواتهم فين
أنا معرفش
تقولش وقعوا كده فـ الأرض ؟
مين فيهم بتجُر وتسحب
وانهو بترفع أو تِهْبِد وتوَقَّع تحت
أنا معرفش
تقولش حصلي سطو مسلح
على راسي ومنها بقا يمسح
أنا معرفش
بس اللي انا فاكراه بالظبط
إني بحبك
وادي الحتة اللي انا فيها
وعقلي مازال ماسك ومتَنَح
أضف الى مفضلتك
  • del.icio.us
  • Digg
  • Facebook
  • Google
  • LinkedIn
  • Live
  • MySpace
  • StumbleUpon
  • Technorati
  • TwitThis
  • YahooMyWeb

ـــــــــــــــــــــــــــــــــــــــــــــــــــــــــ
تحرير الإدراج التصنيفات : غير مصنف |   دوّن الإدراج  

3 تعليق على “حكاية راجل عسولة(من ديواني طعم الحياة)…للقيد4

هناك 3 تعليقات:

  1. ما الذي ينبغي علينا لكي لا يصيب منزلنا من التعرض لمهاجمة الحشرات والتواجد والتكاثر فيه .
    1_ التخلص من جميع بقايا الاطعمة في اسرع وقت وعدم تركها مده كبيرة على الارض او السفرة او المطبخ لان زالك يجلب الحشرات وفي بعض الاوقات تتواجد به وتتكاثر فلا بد من النظافة دائما .
    2_ تنظيف ارضيات المنزل دائما يوميا بالماء وبعض المنظفات المطهرة مثل الكلور
    المكافحة الكمالة
    .
    3_ العمل على الصيانه دائما وعدم ترك فتحات في المنزل او المطبخ او الحمامات لان زالك يجلب الفئران بكثرة .
    4_ يجب تجفيف الارضيات بعد التنظيف جيدا وعدم ترك اي بقايا للاطعمه وغيرها لعدم ترك اي شيء للحشرات للتغزية عليها .
    5_جلب بعض احهزة الصواعق الكهربية واجهزة الناموس وهي اجزة لدينا نور يجب الناموس الزباب اليها وعند الوصول اليها ولمسها سوف يموت الزباب او الناموس والتخلص منه نهائيا عن طريق الكنس بالمكنسة الكهربية او غيرها .
    ما الزي يميز شركتنا عن الشركات الاخرى
    تعتمد شركتنا اعتمادا كليا على عدة عوام اساسية تجعلها دائما رائدة في مجال مكافحة الحئات والبعد كل البعد عن اقرب منافسيها واليكم بعد العوامل

    .التنظيف

    1_ تعتمد شركتنا اعتمادا كليا على فريق عمل متخصص يتميز بالخبرات الكبيرة ومختارون بعناية كبيرة جدا لهذة الخدمة كما يتواجد لدينا فريق عمل مصري وفلبيني على درجة عالية من الكفاءة والخبرات التراكمية الكبيرة خلال السنوات العشر الاخيرة .
    2_ يتواجد لدى شركتنا جميع الاجهزة والالات الحديثة التي تستورد من الدول الاروبيه والتي تستطيع الوصول الى ابعد الاماكن للتخلص من الحشرات بشكل كبير والوصول الى اضيق الاماكن التي يتواجد بها الحشرات للتخلص منها .

    ردحذف